ᏣᎳᎩ ᎠᏰᎵ ᎤᏍᎪᎸᏕᏍᏗ ᎤᏣᏘ ᎤᏴᏜ ᏧᏂᏂᏴᏗ ᏂᎨᏒᎾ ᏗᎨᏥᏣᏲᏍᏗ ᎤᎬᏩᏟ ᎠᏎᏊᎢ ᎾᏍᎩᎾ ᎠᏁᎳ ᎠᎴ ᏗᏐᎢ ᏓᏂᎳᏍᏓᏢ ᎠᏰᎸ ᏚᏙᏢᏒ ᏂᏙᏓᏳᏂᎶᏒ ᏧᏂᏢᎩ ᎤᎵᏍᏚᎢᏎᏍᏗ ᎦᎵᏉᎩ ᏌᎾᎴ ᎠᏓᎴᏂᏍᎩ ᎾᎿ ᏑᏓᎵ  ᎢᎪᎯᏓ. ᏚᎵᏍᏗ ᏔᎵᏍᎪ ᏅᎩᏁ ᎾᎿ ᏚᎵᏍᏗ ᏔᎵᏍᎪ ᏧᏁᎵᏁ ᎢᎪᎯᏓ ᎾᎿ W.W. ᎮᏍᏗᏂ ᏧᏂᏢᎩ.

“ᏂᏓᏕᏘᏴᎯᏒ ᎾᎿ ᎤᏴᏜ ᏧᏂᏂᏴᏗ ᏣᏟᎵᎶᎯᎰ, ᎤᏟᏂᎩᏓ ᎤᏥᏂᎳᏗᏍᎪ ᎾᏂᎥ ᏗᎨᏥᏣᏲᏍᏗ ᎾᏍᎩ ᎤᏍᎦᏎᏍᏗ ᎤᏴᏜ ᏧᏂᏂᏴᏗ ᏂᎨᏒᎾ,” ᎦᎸᎳᏗ ᎦᏙᎩ ᏗᏓᏘᏂᏙ ᎾᏍᎩ ᎠᏰᎸ ᏄᏛᎿᏕᎬ ᎤᎾᎦᏎᏍᏗᏕᎦ ᏄᏪᏒ Dr. Charles Grim. “ᎯᎠ ᏧᏕᏘᏴᏌᏗ Ꮭ ᏄᏓᎴᎢ ᏱᎩ ᎠᏂᏏᏴᏫ ᏗᎨᏥᏣᏲᎸ ᎠᎾᎵᏍᏕᎸᏙᏗᏍᎪ ᎠᎴ ᎾᏍᎩ ᏳᏂᏢᏣ Ꮭ ᎾᏍᎩ ᎢᏳᏍᎦᏎᏗ ᏱᎨᏐᎢ.”

ᏂᎪᎸ ᎡᏙᎯ ᏧᏂᏢᎩ ᎤᎷᎯᏍᏗ ᏧᎾᎵᏍᏓᏴᏗ ᎮᏍᏗᏂ ᎤᏬᏪᎶᏗ ᎠᎴ ᏯᏥᏣᏲᎢ. ᎾᏍᎩᏃ ᎩᎳ ᎠᎾᎴᏂᏍᎩ ᎤᏂᎮᏍᏗ ᎬᏂᎨᏒ ᏫᏄᎾᏛᏗ ᏧᏃᏪᎶᏗ ᎢᎬᏱ.

ᎾᏍᎩᎾ ᏗᎨᏥᏣᏲᏍᏗ ᎾᏂᎥ ᎠᎬᏩᏟ. ᎠᏰᏟ ᎾᏍᎩ ᎥᏳᎩ ᎠᏂᎭᎷᎩᏍᎩ ᎠᏂᏂᎳᏗᏍᎪ ᎾᏍᎩ ᏯᏛᎾ ᎠᏂᏩᎾᎦᎳ ᏱᎩ ᎠᎴ ᎠᎯᏓ ᏧᎾᏓᏂᎶᎯᏍᏗᎢ, ᏗᏂᏲᏟ ᏑᏓᎵ ᎢᏯᏅᏓ ᎠᏓᎴᏂᏍᎩ ᎾᎿ ᏐᏁᎳᏚ ᎢᏧᎾᏕᏘᏴᏓ ᎢᏍᏗ, ᏧᎾᏓᏃᎵᏕᎾ ᎠᏂᎨᏯ, ᎾᏂᎥ ᎯᎦᏍᎪ ᎤᎶᏒᏍᏓ ᎢᏧᎾᏕᏘᏴᏓ ᏧᎾᏓᏂᎳ ᎠᎴ ᎾᏍᎩ ᎢᏳᏍᏗ ᎤᏙᏢᏒ ᏧᏂᎪᎵᏰᏗ ᏧᎾᏓᏂᎳ ᏧᏂᎸᏫᏍᏓᏁᎯ.

ᎤᎪᏛ ᏲᏚᎵ ᎠᏕᎶᎰᎯᏍᏗ, ᏩᏟᏃᎮᏙᏗ Dr. Brandon Taylor at 918-458-3179.