ᏓᎢᏆ, ᎣᎦᎵᎰᎹ. –  ᎠᏂᏴᏫᏯ ᏗᏂᏰᎸ ᏄᎾᏛᎾᏕᎬ ᏗᏂᏍᏕᎸᎯᏙ ᎬᏂᎨᏒ ᏄᏅᏁᎸ ᏣᎳᎩ ᎠᏰᎵ ᎥᏱᎸ ᏄᏛᎾᏕᎬ ᏗᏂᏍᏕᎵᏍᎩ ᏧᎸᏫᏍᏓᏁᎯ Linda Squirrel ᏂᎦᏓ ᎤᎵᏍᎪᎸᏔᏅ ᏚᏁᎸ ᎾᎿ ᏗᎨᏥᏐᏅᏅ ᎠᎴ ᎤᏟᏍᏗ ᎠᎦᏎᏍᏙᏗ, ᎤᏟᏍᏗ ᏅᏬᏘ ᏯᎾᏛᏁᎯ ᎠᎴ ᎬᏥᏐᏅᏅ ᎠᎭᎷᎩᏍᎩ ᎾᎿ ᎠᏁᎯᏯ ᎠᎹᎵᎧ ᎠᎵᏍᎪᎸᏗᏍᎬ  ᎤᎩᏍᏗ ᎠᎪᎵᏍᏙᏗ ᏄᏛᏁᎸᎢ.

“ (Linda’s) ᎤᎵᏍᎨᏓ ᎠᎴ ᏂᎬᏱᎵᏒ ᎠᎵᏍᎪᎸᏗᏍᎬ ᏙᎯᏳ ᎤᎪᏓ ᎤᎵᏍᏕᎸᏓ ᎾᎿ ᎤᏬᏢᏅ ᏗᎨᏥᏐᏅᏅ ᎠᎴ ᎪᏇᏍᏗ ᎤᎾᎵᏍᏓᏁᎸ ᎠᎭᎷᎩᏍᎩ ᎤᎾᏙᏢᎯ ᎪᎯ ᎢᎦ,” David Boyd, IHS ᎬᎾᏕᎾ ᎤᏣᏘ ᎨᏥᏐᏅᏅ ᎢᏳᎾᏛᏁᎵᏓᏍᏗ ᎠᏓᏅᏖᎵᏙᎯ, ᎤᏛᏅᎢ. “ᎤᎦᏎᏍᏔᏅ Ꮎ ᎨᏥᎪᎵᏰᏗ ᎠᎦᏎᏍᏙᏗ ᏄᏍᏛ ᎤᏂᏂᎬᏎᎸᏁᎲ ᏚᏂᎸᏫᏍᏓᏁᎲ ,ᎪᏢᏗ, ᏚᎾᏙᎵᏤᎲ ᎠᎴ ᏍᏓᏯ ᏗᎦᎸᏫᏍᏓᏁᏗ Ꮭ Ꮟ ᎠᎪᎲ ᎠᎴ ᎤᏂᎦᏙᎲᏒ ᏱᎩ ᎠᏂᏴᏫᏯ ᏍᎦᏚᎩ.”

Squirrel ᎤᎴᏅᎲ ᏚᎸᏫᏍᏓᏁᎲ ᏣᎳᎩ ᎠᏰᎵ ᏦᏍᎪ ᏦᎢ ᎾᏕᏘᏯ, ᏂᎪᎯᎸ ᎢᏳᏍᏗ ᏚᎸᏫᏍᏓᏁᎰ ᎾᎿ EMS. ᎤᎵᏍᏕᎸᏓ ᎤᎴᏅᏓ ᎠᎴ ᎤᏬᏢᏅ ᎠᏂᎳᏍᏓᏢ EMS ᎤᎾᏓᏡᎬ ᎾᎿ ᎣᎦᎵᎰᎹ ᎠᎴ ᏂᎬᎾᏛ ᎠᏰᎵ ᎤᏂᎪᏓ ᏚᎾᏙᏢ ᏗᏍᏕᎸᎯᏙ ᎠᎴ ᎠᎧᎻᏗ ᏄᎵᏍᏔᎾ ᏓᏍᏕᎵᏍᎬ ᎠᏂᎳᏍᏓᏢ EMS. ᎤᎪᏛ ᎾᏞᎬ ᏚᏍᏕᎸᎭ ᎾᎿ U.S ᎤᎾᏙᏢ ᎤᏁᏓᏍᏙᏗ ᏂᎬᎾᏛ EMS ᏗᎨᏲᏂᏙ ᏗᏂᎳᏫᎦ ᎠᏂᏅ ᏂᏓᏛᏁᎲ ᏁᎵᏍᎪ ᎤᎶᏒᏍᏓ ᎠᏂᎳᏍᏓᏢ EMS ᏚᎾᏙᏢᏒ ᎠᏰᏟ ᏫᏚᏳᎪᏛ.

“ᏂᎪᎯᎸ ᎠᏆᏚᎵᏍᎬ ᎾᏍᎩᎾ ᎤᏁᏉᏍᏗ ᎠᏂᎳᏍᏓᏢ EMS ᎠᎴ ᏗᎨᏥᏐᏅᏅ ᏧᏂᏍᏕᎸᏗ,” ᎠᏗᏍᎬᎢ.  “ᎢᎸᏍᎩ ᏕᎬᎩᏁᎳ ᎢᎸᏍᎩ ᎬᏩᎵᎮᎵᏍᏗᏍᎬ ᎠᎴ ᎬᏂᎨᏒ ᏂᎬᏮᏁᎲ ᏧᏕᏘᏴᏓ ᏓᎩᎸᏫᏍᏓᏁᎸ, ᎠᏎᏃ ᎯᎠ ᎬᏩᎵᎮᎵᏍᏗᏍᎬ ᎤᎵᏍᎨᏓ ᎠᏯ ᎨᏒᎢ ᎾᏃ Dr. Boyd ᎠᎩᏅᏁᎸᎢ.”