ᏓᎵᏆ, ᎣᎦᎵᎰᎹ. ¬– ᎠᏕᎶᎰᎯᏍᏗ ᎾᎿ ᎠᏓᏴᏍᏕᏍᎩ ᎠᎴ ᏃᏒᎾ  ᏅᏬᏘ ᎠᏅᏔᏅᏍᎩ ᎠᏂᏑᎵᎪᎦ ᏏᏅᏓ ᏃᏊ, ᏣᎳᎩ ᎠᏰᎵ ᎬᏂᎨᏒ ᏄᏩᏁᎳ ᎢᏤ Alcoholics Anonymous ᏓᎾᏠᏍᎬ ᎤᏙᏢᏎᏍᏗ ᏗᏩᏛᎯᏓᏍᏗ ᏑᏓᎵ ᎠᏰᏟ ᎠᎴᏂᏍᎩ ᎠᎴ ᎦᎵᏉᎩ ᎠᏰᏟ ᎢᎪᎯᏓ ᏒᎯᏱᏯ ᎾᎿ ᏦᎢᏁ ᎢᎦ ᎾᎿ 118 B Keetoowah St.

Sherry Baker, ᎢᎬᏱ ᎦᏙᎩ ᎠᎨᏯ ᎾᎿ ᏣᎳᎩ ᎠᏰᎵ, ᎤᎴᏅᎲ ᎯᎠ ᎢᏤ AA ᏧᎾᏠᎯᏍᏗᎢ. ᎤᏛᏅ ᎤᎪᎲ ᎧᏂᎬᎬᎾᏍᎩ ᏗᎾᏗᏔᏍᎩ ᎠᏂᏑᎵᎪᎦ ᎤᎾᏙᏢ ᎠᏁᎯᏯ ᎠᎹᎵᎧ (ᎠᏂᏴᏫᏯ) ᎣᏍᏓ ᏱᏚᎾᏓᏅᏔ ᎤᏁᏓᏍᏗᎢ.

“ᎯᎠ ᎠᏎᎸᎯ ᎾᎥᎢ ᎠᎴ ᎣᏍᏓ ᎠᏆᏓᏅᏔ. ᎠᎩᎪᎭ ᎾᏍᎩ ᏗᏆᎵ, ᏏᏓᏁᎸ ᎠᎴ ᏍᎦᏚᎩ ᎠᏁᎳ ᏄᎾᎵᏍᏓᏁᎲ ᎾᏍᎩ ᎠᏓᏴᏍᏕᏍᏗᏍᎩ ᎠᏅᏗᏍᎩ ᏱᎩ ᎪᎯᎦ ᏂᏓᎬᏩᎴᏅᏓ ,” ᎠᏗᏍᎬ Baker. 
“ᏂᎦᏓ ᎠᎭᏂ ᎢᎦᏠᏯᏍᏔᎾ ᎢᎦᏓ ᎨᏲᏟ , ᏐᎢᏃ ᎤᎪᏓ, ᎢᎩᎪᎭ, ᎾᏍᎩ ᎤᏲᏟ ᎨᏒᎢ, ᎠᏎᏃ ᎡᎵᏊ ᎬᏩᏂᏑᎵᎪᏍᏗ ᎢᏳᏃ ᏱᏓᏍᏕᎸᎯ ᎠᎴ ᏱᏓᏍᏕᎸᎯ, ᎾᏍᎩᏃ ᎢᏳᏍᏗ ᎢᎦᏚᎵ ᎯᎠ ᏓᎾᏠᏍᎬ ᎤᎾᏛᎪᏗᎢ ᎤᎾᎵᏍᏕᎸᏙᏗ.” 

ᏚᎾᏙᎵᏤᎲ ᎾᎿ ᎠᏰᏟ ᎥᏳᎩ ᎠᏂᎭᎷᎩᏍᎩ ᎠᎴ ᎠᎾᎴᏫᏍᏙᏗᏍᎩ, ᎾᎥᏂᎨᏍᏗ ᏔᎳᏚ percent ᏓᏂᏲᎱᏍᎦ ᎾᎿ ᎠᏁᎯᏯ ᎠᎹᏰᏟ ᎠᏁᎲ ᎠᎴ Alaska ᎠᏁᎯᏯ ᎾᎿ ᏔᎵ ᏯᎦᏴᎵ ᏌᏊ ᎾᏃ ᏔᎵ ᏯᎦᏴᎵ ᎯᏍᎩ ᎢᏧᏕᏘᏴᏓ ᎢᎪᎯᏓ ᎠᏓᏴᏍᏕᏍᏗᏍᎩ ᏚᏂᏝ. ᎤᏂᎪᏓ ᎠᏂᏴᏫ ᎠᎾᏁᎶᏍᏗᏍᎬ ᎤᏂᏑᎵᏍᎪᏍᏗ ᏩᎾᎦᏔᎲᏍᎪ AA ᏚᏃᏢᏒ ᏩᎾᎦᏔᎲᏍᎪ ᏝᏃ ᎩᎶ ᏳᏅᏙ, ᎩᎶ ᎬᏩᏓᏃᎮᏗ Ꮭ ᎠᎴ ᏗᏟᏃᎮᏗ ᎠᏂᏐᎢ ᎤᏠᏯ ᎤᎾᏚᎵᏍᎩ ᎠᏂᏯᎣ ᎣᏍᏓ ᎢᏳᎾᎵᏍᏓᏁᏗ ᎤᎬᏩᏟ.

Baker ᎠᏗᏍᎬ ᏂᎦᏓᏊ ᎠᏂᏣᎳᎩ ᎠᎾᏓᎵᏍᎪᎸᏗᏍᎩ ᏧᏂᎸᏫᏍᏓᏁᏗ ᎤᎾᏂᎩᏍᏗᏗᏐ ᎤᏙᏢᏒᎢ ᎠᎴ ᎤᏚᎩ ᎤᏅᏐ ᎤᏓᏃᎯᏍᏗ ᏧᏂᏍᏕᎸᏗ ᎠᎵᏍᎪᎸᏛ ᎾᎿ ᎤᏙᏢᏒ ᎠᏠᏯᏍᏙᏗ ᎤᎪᏛ ᏗᏠᎯᏍᏗ ᎠᎴ ᎣᏍᏓ ᎢᎬᏩᎾᎵᏍᏓᏁᏗ ᎬᏩᏂᏑᎵᏍᎪᏍᏗ ᏧᏂᏍᏕᎸᏗ ᎤᏙᏢᏒᎢ.

ᎯᎠ ᏓᎾᏠᏍᎬ ᎤᏂᏍᏚᎢᏌ ᎾᎿ ᏂᎦᏓ ᏗᎦᏃᏣᎵ ᏂᎨᏒᎾ. ᎤᎪᏛ ᎠᏕᎶᎰᎯᏍᏗ, ᎠᏟᏃᎮᏙᏗ Sam Bradshaw at 918-207-5538. ᎤᎪᏛ ᎠᏕᎶᎰᎯᏍᏗ ᎾᏍᎩ ᎯᎠ Alcoholics Anonymous visit www.AA.org.